Dende o grupo municipal do BNG critican que non recibiu o apoio de ningunha forza para que prosperase unha moción sobre a comunicación institucional.
Camilo Vila defendía na última Comisión Informativa da área de Cultura, a necesidade de tomar medidas que lle permitise á veciñanza comunicarse dun xeito pleno coa Administración local na súa propia lingua. O equipo liderado por Vila atopouse co bloqueo de Partido Popular, PSOE e Áxil, que botaron abaixo a proposta.
O grupo nacionalista explica que vén detectando como o galego se usa cada vez menos tanto na comunicación formal coma non formal na Casa Consistorial e en toda a produción que emana dela, malia representar a unha comunidade formada por un 90% de galego falantes.
A moción enumeraba unha serie de eivas a corrixir antes da celebración do Día das Letras. Vila lamenta que “para este grupo de goberno non é prioritaria a lingua”.
Amador Díaz, alcalde de Xinzo, explica que “imos cambiar o contestador do Concello ao galego, pero non apoiamos esta moción porque o grupo de goberno defende a lingua galega”.