O PSdeG-PSOE de Xinzo de Limia deplora o desleixo do alcalde e o grupo de goberno polo proxecto de humanización da N-525. “Catro meses despois da toma de posesión da nova corporación, que asegurou viña a arranxar con millóns de euros a situación do concello, os proxectos realmente importantes, xa aprobados e publicados, como o da estrada N-525, non merecen nin a máis mínima atención para a súa realización”, denuncia a voceira socialista, Elvira Lama. Segundo esta, “o actual estado de parálise evidencia que ninguén se preocupou polo estado da tramitación dun proxecto que se entoxa vital para a Limia”. Diante de tal estado de inacción, as e os socialistas de Xinzo de Limia pretenden evidenciar o desleixo do alcalde e do grupo de goberno de Axil e PP sobre unha obra xa acordada pola anterior alcaldesa.
Para o PSdeG-PSOE trátase dunha “obra transcendental” para a Limia, que “merece investir o máximo de esforzos e traballo para que se faga realidade a curto prazo”, amosando a actual parálise a inaptitude do rexedor de Axil para culminar un proxecto xa acordado durante o anterior mandato e, de paso, a desconfianza cos seus socios de goberno do PP.
“Os receos entre Amador Díaz Penín, do grupo Axil, e os populares impiden calquera avance, amais de constatar que o proxecto de humanización da N-525 non era do agrado do PP, pero non por cuestións técnicas, senón polo feito de ter que asumir a súa absoluta incapacidade de dialogo coa administración do Estado para acadar a financiación necesaria, como si fixemos nós”, engade Lama.
Elvira Lama: “A conclusión que tiramos é clara, pudendo afirmar que este asunto non é do seu interese, se ben para nós é prioritario e continuaremos a traballar para que se faga realidade unha obra tan trascendental para as nosas veciñas e veciños”.
Amador Díaz, alcalde de Xinzo, non quixo facer declaracións ao respecto.
