As escolas municipais de Allariz perfilan o curso

O curso académico tamén comeza de novo no Fogar dos maiores de Allariz, nas escolas de pintura e música, e na Casa da mocidade da vila. Así, dende o Consistorio preparan unha ducia de actividades para as que será posible anotarse nos vindeiros días.

Por unha banda, no Fogar dos maiores haberá, a partir de outubro, alfabetización dixital para a vida cotiá -móbil, tablet e ordenador-, ximnasia terapéutica, estimulación cognitiva, clases de canto, e arte ou creatividade. As inscricións abriranse o vindeiro día 15 de setembro e as persoas interesadas nestas iniciativas poderán contactar no teléfono 988 554 059 ou enviar un correo electrónico a fogardosmaiores@allariz.gal.

Por outra banda, o prazo de inscrición abrirá no caso das escolas de música e de pintura o próximo 19 de setembro. Neste caso será posible anotarse -a través do teléfono 988 44 08 59 ou do correo electrónico cultura@allariz.gal- a linguaxe musical, a piano ou guitarra, así como a outros instrumentos máis tradicionais como gaita, pandeireta ou percusión. A escola de pintura tamén abrirá o seu prazo de inscrición na mesma data.

Por último, a Casa da Mocidade de Allariz está ultimando os detalles da programación que ofrecerá este outono e que pronto dará a coñecer. Haberá, entre outras, aulas de batería, de guitarra eléctrica e de batucada. Para obter máis información neste caso está dispoñible o correo electrónico mocidade@allariz.gal ou o teléfono 988 442 107.

No tocante á oferta deportiva, a concellería desta área ofrecerá este ano baloncesto, fútbol, piragüismo e equitación - a información ao respecto está a disposición nos distintos clubes e na Hípica Os Invernadeiros.