Protección Civil de Allariz salvou a unha muller tras un infarto: "Estivemos 40 minutos ata que tivo latido"

Esta mañá de venres, unha muller sufriu unha parada cardíaca dentro dun autobús que viaxaba de Madrid a Galicia. Sucedeu na A-52, onde varios ocupantes alertaron aos servizos de emerxencia da situación da vítima. Finalmente, foi reanimada en Allariz, onde a operación dos membros de Protección Civil foi clave. O responsabe de PC de Allariz, Miguel, acudiu á voz de alarma. Horas despois da fazaña, narra que "Foi un pouco caótico polas indicacións, eran xente de fora, non sabían onde estaban".

A actuación do desfibrilador foi clave para reanimar á muller

Unha vez no punto e despois de que un veciño lle aplicara as manobras de RCP, os membros da Protección Civil alaricana utilizaron o desfibrilador semiautomático (DESA): "Entendemos que xa viña sen pulso desde a autovía. Chegou nun momento crítico, levaría 10 minutos en parada"

Malia a crudeza da situación, os voluntarios non desistiron ata conseguir reanimar á vítima: "Estivemos sobre 40 minutos facendo manobras ata que conseguimos que tivera latido", recorda o responsable.

A felicitación dos sanitarios

Despois de devolverlle o pulso á muller, esta foi trasladada en ambulancia para recibir asistencia médica. Ata o punto se trasladou tamén un helicóptero medicalizado, O seu pronóstico se descoñece, pero Miguel admite que "nos gustaría saber dela para coñecer que tal está".

As manobras dos voluntarios resultaron decisivas para rescatar a vida da vítima. Os sanitarios, tras a actuación, aproveitaron o intre para felicitar aos membros de Protección Civil de Allariz: "Agradecéronnos e felicitáronnos pola actuación, tamén nos chamaron da central do 061 de Santiago, para darnos grazas por axudar": relata Miguel, aínda coas emocións a flor de pel, e remata asumindo que só seguiu a chamada do seu deber: "Para iso estamos".

A muller finalmente falleceu no hospital

Logo de acudir ao hospital, fontes oficiais confirmaron o falecemento da muller. Malia que acudiu ao centro todavía con pulso, as autoridades sanitarias confirmaron a morte.