O BNG celebrou o 40 aniversario en Celanova

O BNG celebrou onte o seu 40 aniversario nas comarcas de Celanova e Baixa Limia cun acto no Refectorio do Mosteiro de Celanova, no que se presentou o libro “40 anos ao servizo de Galiza”, de Manuel Anxo Fernández Baz, editado pola Fundación Galiza Sempre. “O BNG foi converténdose nunha ferramenta necesaria para transformar Galiza grazas a ter un proxecto e unha militancia firme”, sinalaba o autor.

No acto participou a deputada nacionalista por Ourense, María González Albert, así como dous históricos do Bloque nestas comarcas: Sindo Rodríguez, que foi o candidato á Alcalde en Celanova nas eleccións de 1983 e 1987; e Xosé Rodríguez Cid, ex concelleiro, ex deputado provincial e delegado de Medio Rural en Ourense durante o goberno do bipartito na Xunta (2005-2009).

Ambos compartiron con outros veteranos militantes nacionalistas as experiencias daqueles primeiros anos, cando o BNG logrou representación en Ramirás en 1979, ata a chegada ao goberno da Xunta. O libro recolle ano por ano a historia do país e as accións do BNG entre os anos 1982 ao 2022.