A Insua dos Poetas enxalza a obra do artista Antón Pulido

A Insua dos Poetas (A Esgueva, Madarnás, O Carballiño) acolle mañá ás 12,00 horas o acto de inauguración da peza artística que Antón Pulido dedica a Arcadio López-Casanova. A obra do recoñecido pintor, gravador e muralista Antón Pulido é o primeiro vitral a toda cor e de grandes dimensións que se instala na Insua dos Poetas. Unha peza singular e de vangarda que harmoniza e dialoga co verdor do espazo natural do seu entorno ( castiñeiros e carballos), titulada “Kermesse para Arcadio”. Unha homenaxe pictórica de Antón Pulido ó poeta, profesor e investigador Arcadio López-Casanova.

No transcurso desta actividade, Luís González Tosar anunciará o nome e apelidos da figura literaria á que se lle dedicará a Festa da Palabra de 2024, que terá lugar, como vén sendo habitual ó longo de vinte edicións, o terceiro sábado de xullo.

Luís González Tosar, escritor e presidente fundador da Insua dos Poetas, é o artífice deste predio de uso público cultural con máis de sete hectáreas de extensión, que xa reúne 25 pezas artísticas. Esculturas e pinturas murais dedicados a grandes autores da literatura galega (Rosalía de Castro, Eduardo Pondal, Curros Enríquez, Valentín Lamas Carbajal, Ramón Cabanillas, Vicente Risco, Castelao, Blanco-Amor, Álvaro Cunqueiro, Pura e Dora Vázquez, Celso Emilio Ferreiro, Carlos Casares, Xela Arias e outros importantes poetas e narradores).

Xa confirmaron a súa presenza no acto, Luis Menor, presidente da Deputación de Ourense; Valentín García, secretario xeral de Política Lingüística; Gabriel Alén, delegado da Xunta en Ourense; Francisco Fumega, alcalde do Carballiño, e outros alcaldes da comarca; Antón Pulido e outros artistas plásticos, escritores, xornalistas e persoeiros do mundo cultural galego, segundo Luís González Tosar.