O adestrador do Celta de Vigo, Paco Herrera, manifestou neste xoves que nin el nin a dirección deportiva son partidarios de que o centrocampista Dani Abalo abandone o equipo no mercado do inverno, aínda que aclarou que aceptará a decisión que tomar o xogador.
'Para el é bo que tome unha decisión canto antes. Se decide continuar aquí será fantástico, mais se decide saír tamén hai que aceptalo. Como moito, mañá xa saberei algo. Nin a miña intención nin a do club é abrirlle as portas e se sae non pedirei un recambio para esa posición', indicou Herrera na rolda de prensa.
Neste sentido, o adestrador do Celta subliñou que hoxe non falou persoalmente con Dani Abalo e que a última vez que o fixo foi 'por teléfono' antes de iniciar as vacacións do Nadal.
'Non sei cal é a súa situación porque todos tomamos nestas datas o noso período de reflexión. A partir de agora o máis importante é a súa decisión porque eu xa me manifestei, el ten que estar convencido de estar connosco ou buscar unha saída temporal', apuntou.
