A reforma da Vía da Plata ao paso por Fumaces, en Riós, terá 237.251 euros

CAMIÑO DE SANTIAGO

A Consellería de Vivenda e Planificación de Infraestruturas vén de anunciar a adxudicación á empresa Construcciones Ropán S. L. das obras de reforma e mellora de rúa en Fumaces

A alcaldesa do Riós, Eva Barrio, a conselleira de Vivenda e Planificación de Infraestruturas, María Martínez Allegue e o delegado territorial en Ourense, Manuel Pardo, na sinatura do convenio, o pasado mes de xullo.

As obras neste núcleo, pertencente á localidade do Riós e polo que pasa a Vía da Prata, son necesarias dado o actual mal estado de conservación e de deterioro do pavimento da devandita rúa, e contarán un orzamento total de 237.251 euros.

Estas actuacións enmárcanse nun convenio de colaboración asinado entre a Xunta e o Concello do Riós ao abeiro do Plan Hurbe o pasado mes de xullo, e segundo o cal a Xunta asumirá o 70% do orzamento desta intervención, mentres que o Concello orriolense achegará o 30% restante.

Deste xeito, as obras permitirán mellorar a accesibilidade da poboación de lugar e contribuír á mellora paisaxística da contorna do Camiño de Santiago.

Con ese obxectivo, levarase a cabo unha reforma da rúa, levantando o pavimento existente, arranxando aqueles tramos da canalización de augas pluviais que presenten deficiencias e colocando unha nova pavimentación acorde coa contorna do Camiño.

Plan Hurbe

O Plan Hurbe que impulsa o Goberno galego trátase dunha iniciativa que ten como finalidade axudar ás administracións locais a financiar diferentes tipos de intervencións urbanísticas.

Contenido patrocinado