"Salvemos o Macizo Central", o manifesto contra o parque eólico de Rebordechao

A Asociación para a Defensa Ecolóxica de Galiza (Adega) publicou este domingo o manifesto "Salvemos o Macizo Central", co obxectivo de dar a coñecer, concienciar e denunciar publicamente a ameaza que o parque eólico de Rebordechao supón para o Macizo Central: "O seu patrimonio natural e cultural, pasando polas posibles repercusións na saúde e a influencia negativa na economía", explican.

A través do manifesto, a delegación de Adega en Monterrei procura reunir o máximo apoio social de cara ao rexeitamento deste proxecto formado por 28 aeroxeradores, cunha potencia de 154 MW en total, "unha auténtica aberración ambiental e paisaxística", sinalan dende a Asociación.

Salvemos o Támega-Adega Monterrei, xunto coa colaboración de Rubén Bermejo e Xosé Romero, son os autores do manifesto, e destacan que "detrás de nós está cada aldea, cada monte, cada costa afectada da nosa terra por esta desfeita que converte a Galicia nunha terra de sacrificio a pasos de xigante".

Ante a situación, a Asociación pide a firma do manifesto para a oposición ao proxecto do parque eólico de Rebordechao, e indican que os apoios acadados a través desa sinatura, "serán entregados diante da Dirección Xeral de Política Enerxética", un organismo do Ministerio de Transición Ecolóxica, que está a tramitar o expediente.