A Biblioteca de Verín reuniu a máis dun centenar de alumnos con Domingo Villar

Esta mañá celebrouse a videoconferencia "De ollos de auga ata O último barco: a serie de Leo Caldas", impartida polo escritor Domingo Villar, e organizada pola Biblioteca Pública Municipal de Verín.

Na videoconferencia participaron máis dun centenar de alumnos e alumnas de centros educativos da vila: IES Castro de Baronceli, IES Taboada Chivite, IES García Barbón e CPR María Inmaculada.

Durante máis de media hora, Villar faloulles aos escolares, dunha maneira amena e próxima sobre as singularidades da Novela Negra, e sobre a súa serie policíaca protagonizada por Leo Caldas, un solitario e melancólico inspector de policía.

Ademais, no encontro virtual tamén participou o actor Carmelo Gómez, que interpreta a Caldas na película "A praia dos afogados", baseada na novela homónima de Villar.

Próximas videoconferencias

Este evento forma parte do programa de videoconferencias temáticas online, organizado pola Biblioteca , no que os alumnos e alumnas dos centros escolares da vila son o principal público das charlas, que se imparten en horario matinal e cunha duración aproximada de 30 minutos.

Tras esta primeira toma de contacto, as conversas son postas á disposición do público xeral na canle oficial de youtube da Biblioteca.

Continuando co ciclo, o próximo 21 de maio, a escritora e avogada Ledicia Costas falará sobre o seu libro "Infamia", e o 3 de xuño, a escritora Eva Mejuto presentara a súa obra "Memorias do silencio".