Castrelo acondiciona Nocedo do Val: rehabilitación da casa do pobo, da zona da fonte e do forno

Castrelo do Val participa nun obradoiro conxunto con Laza e Vilardevós, que contan cun total de 20 alumnos, repartidos en módulos de xardinería e albanelaría polas diferentes actuacións programadas para dito curso. Unha brigada de 5 usuarios está desenvolvendo tarefas de restauración e acondicionamento dunha área de Nocedo do Val, en Castrelo.

Dende que comezou o obradoiro, a mediados de decembro, e tras a formación oportuna, os alumnos fórmanse pondo en práctica os coñecementos adquiridos. No módulo de albanelaría que traballa na rehabilitación de Nocedo do Val, están a traballar na casa do pobo, na zona da fonte e no forno, que ao remate das obras, locirán cun aspecto renovado e totalmente novo.

Nestes días, están a traballar na reparación das xuntas do forno tradicional de Nocedo, como contou Rubén García, o director, que engadía que "estamos adaptandoo aos fornos antigos, ademáis na casa do pobo meteremos un cuarto de baño acondicionado para persoas discapacitadas e acondicionaremos a zona axardinada da fonte, para darlle un toque renovado a esta zona".

Para que os alumnos leven a cabo estas tarefas, traballan baixo a supervisión de Raúl Alvar, un dos profesores que se encargan de formar e ensinar aos adscritos a este obradoiro conxunto.

O alcalde de Castrelo xunto co director e o profesor do obradoiro na porta do forno.

Ademáis deste obradoiro, o Concello de Castrelo do Val tamén forma parte dun obradoiro da Mancomunidade de Verín, e tamén hai outro en marcha dos municipios de Cualedro, Monterrei e Oímbra.

Pola súa parte, Vicente Gómez, alcalde de Castrelo do Val, contento coas obras, asegura que "son cousiñas que se van facendo e sobre todo estase a formar xente", pondo en valor estas iniciativas. O rexedor municipal remarca que ademais da rehabilitación desta zona de Nocedo, "tamén está estipulado traballar nun local de Castrelo, en noutras dúas áreas de Nocedo do Val", no que atinxe a este concello.

Respecto ás actuacións que se están desenvolvendo en Laza e Vilardevós, Rubén García conta que de momento en Vilardevós a actividade está parada, "a espera de que mellore o tempo para poder comezar as labores oportunas", mentres que en Laza "se está traballando en xardíns e preparando madeiras de bancos, ademais do acondicionamento da área recreativa do Toural".

Futuro

Dende o Concello de Castrelo do Val, Vilardevós e Laza están preparando a documentación necesaria para solicitar á Xunta de Galicia outro obradoiro, que no caso de que sexa concedido comezaría en setembro, ao remate do que está agora en marcha.