Os veciños de Castrelo de Cima non falan doutra cousa: da celebración da 50 edición da súa tradicional queimada, enmarcada nas festas patronais. Este fin de semana, os veciños e visitantes encheron esta pequena aldea rural do concello de Riós de maxia, medo, espíritos, cores e moita tradición e sentimento.
Un espectáculo que non deixou a ninguén indiferente e co que se busca declarar este evento como Festa de Interese Turístico de Galicia, a través do Concello. A cita naceu hai medio século da man de dous veciños. “A festa estaba moi morta, viamos como a xente non o estaba a pasar ben e había moi poucas persoas, decidimos improvisar e organizar unha queimada para a noite, a cousa gustou e os anos seguintes continuamos organizándoo”, conta un veciño, orgulloso da traxectoria e fama que adquiriu a queimada.
Unha cita que naceu para facer desfrutar aos veciños de Castrelo de Cima e que hoxe busca converterse nun evento de atracción turística, no que os habitantes desta aldea rural son os anfitrións. Unha cita que cada ano supera ao anterior, en organización e número de participantes.
