Colexios de Verín e Viana, unidos na axuda a Valencia

Tres Colexios de Educación Infantil e Primaria (CEIP), os verineses Amaro Refojo e Princesa de España e máis o Bibei vianés, veñen de aliarse co obxectivo de recadar fondos para os damnificados pola dina que asolagou Valencia o pasado 29 de outubro, ao tempo que fomentan diversos valores entre o seu estudantado.

Baixo o lema “Con V de Valencia”, aproveitando que as dúas vilas implicadas (Verín e Viana) comparten inicial, estes centros unen as súas forzas cun mesmo fin solidario.

A campaña de recollida de fondos deseñada polos tres colexios permite axudar ao seu alumnado, profesorado e familias de tres xeitos distintos: facendo un ingreso nunha conta aberta a tal efecto, ingresando cartos nunha urna que se coloca no patio ao inicio e final de cada xornada, ou levando petos creados para a ocasión a casa e visitando a familiares e veciñanza para facelos partícipes da campaña. Todos os cartos recadados ingresaranse na conta oficial da Cruz Vermella.

Transmisión de valores

Fran Guede, profesor de Educación Física do Amara Refojo, apunta a que esta campaña vai máis alá da simple recadación de fondos: “A idea fundamental é recoller a maior cantidade de cartos posible para Valencia, si, pero tamén fomentar entre o noso alumnado valores tan fundamentais como a solidariedade, a bondade, o traballo en equipo, a xenerosidade, co fin de transmitirllas nesta sociedade cada vez máis deshumanizada”.

A Agrupación Deportiva Monterrei une aos colexios participantes, representados polos profesores Alba López e Yolanda Macías (CEIP Bibei), Carlos Crespo (CEIP Princesa de España), e Carlos Santamarina (CEIP Amaro Refojo).