O comercio local de Verín concede premios de ata 300 euros

O comercio local de Verín súmase á campaña “Mercar no teu comercio ten premio” da Federación de Comercio de Ourense, unha iniciativa que comeza este venres na vila do Támega e que se prolongará ata o 20 de outubro. O obxectivo é impulsar o comercio local e fixar clientes.

“O que hai que facer é gardar os tíckets de compra e o día 20, na Praza García Barbón, colocaremos unha carpa na que os clientes poderán trocar os seus tíckets por boletos de participación no sorteo”, explica José Ángel Rodicio, xerente da Asociación de Empresarios de Verín (Aever).

Ás 20,05 horas celebrarase o sorteo que outorgará un total de 900 euros. Haberá dous gañadores dunha tarxeta prepago de 300 euros e seis gañadores de tarxetas de 50 euros. Os gañadores poderán gastar estas cantidades de diñeiro nas tendas do comercio local. “Cremos que é unha boa oportunidade, por unha compra mínima de 10 euros o cliente terá unha participación no sorteo, os premios son seguros”, conclúen dende Aever.