Eva Barrio: "traballaremos para solucionar problemas da auga e potenciar o turismo e a cultura"

Eva Barrio fíxose coa alcaldía de Riós o pasado 28M, logrando maioría absoluta con sete edís, fronte aos dous socialistas. Un éxito para a rexedora, quen se presentou por primeira vez á alcaldía tras estrearse no cargo hai un ano.

Como acolleu os resultados?

Con moita satisfacción. Sentirse apreciada e querida é a mellor sensación que se pode acadar. Un ano de goberno e que a xente apoiara a nova maneira de facer e traballar é algo marabilloso, xeroume ilusión, así como gran responsabilidade.

Como foi a primeira etapa como alcaldesa?

Foi un ano duro, a vida cámbiache totalmente, renuncias a moitas cousas. Compatibilizar o meu traballo e as funcións da Alcaldía requiren de moito esforzo e traballo, foi un ano de superación persoal e laboral. E foi un ano moi satisfactorio, o trato coa veciñanza encántame e tiven esa gran oportunidade. Penso que foi un ano de xestión moi correcta.

Primeira campaña ao fronte.

A campaña non é só de 15 días, é de todos os días do ano. É unha grande responsabilidade encabezar unha lista electoral. Debes dar o mellor de ti para que a xente confíe en ti, elaborar un programa electoral para trazar as liñas de futuro, formar e liderar unha equipa e ao mesmo tempo non deixar quedar mal ás siglas coas que te presentas, non é traballo doado.

Como é o trato coa oposición?

O certo é que imos gobernar cunha maioría moi folgada. O trato coa oposición e pouco e cordial. Espero que siga sendo cordial, terán a man tendida para traballar e sumar, e sobre todo espero que sexa unha oposición construtiva e colaboradora.

Cales son os novos obxectivos?

Presentámonos as eleccións cun programa e pretendemos cumprilo. A grandes trazos e por orde de importancia traballaremos para solucionar os problemas da auga, o aforro enerxético, de potenciar o sector turístico e cultural e por en valor o noso territorio.

Como ve a marcha de Baltar?

Manuel Baltar acaba de ter un extraordinario acto de xenerosidade, espero que o resto da familia do PP de Ourense teñamos esa mesma xenerosidade e saibamos estar á altura das circunstancias. Son tempos de sensatez e respecto á vontade do electorado.