Lavado de cara ao Toural en Laza: parque de caucho, mellora da accesibilidade e árbores nos xardíns

O obradoiroconxunto dos concellos de Laza, Vilardevós e Castrelo do Val, un total de 20 alumnos repartidos en módulos de xardinería e albanería, está a traballar en diferentes actuacións no Concello de Laza.

Nestes días, unha brigada de albanería está acondicionando a zona do Toural, no propio municipio de Laza, onde se está arranxando o muro para mellorar a zona cunha rampla e facer a entrada máis accesible, baixo a supervisión de Verísimo Prieto. Ademais, tamén prepararán unha zona verde e de merendeiro e recuperarán o parque infantil, pondo caucho no chan e sustituíndo as pezas en mal estado.

Rubén García, o director do obradoiro, asegura que "a idea é por en valor a zona xa que ten unha pista de pádel, xardín, pista polideportiva, o parque...", e aposta pola recuperación desta área recreativa, ademais de "facer actividade de reciclaxe, aproveitando a area do parque para o muro, e así ensinámoslle aos alumnos a aproveitar materiais".

No que atinxe á brigada de albanería, tamén realizaron as obras, xa finalizadas, da zona do Calvario en Matamá -no mesmo concello-, unha praza renovada para ser punto de encontro dos veciños, onde loce unha pedra cunha inscripción de 1680.

Pola súa banda, a brigada de xardinería que conta con 10 alumnos -con Beatriz Fernández como instrutora- arranxou os xardíns á entrada de Laza dotandoos de adornos característicos como a máscara do Peliqueiro.

García remarca que "o problema que temos cos xardíns é o mantemento, pero neste caso fixemos un mantemento forte, para que os murales se manteñan en bo estado por moito tempo".

Futuro

Nas vindeiras semanas, este obradoiro conxunto, especialmente a brigada de xardinería, comezará a traballar na zona do Concello de Vilardevós, para acondicionar e facer o mantemento dos espazos verdes do municipio e por en valor zonas do seu patrimonio.