Miguel Ángel Guerra Dos Santos: “O meu obxectivo é que o conservatorio sexa de todos os verineses”

Miguel Ángel Guerra é o novo director do Conservatorio de Verín, un cargo que asume como un reto para este curso que comeza. Ademais é director da banda de música e profesor de clarinete. A súa vida? A música.

Como recibiu este novo cargo?

Pilloume por sorpresa, con ganas de escapar (ri). É moita responsabilidade e roúbache moito tempo. Eu son músico, non administrativo, levo tres ou catro semanas sen coller o clarinete, cando as miñas mañás eran con este instrumento. A pesar diso, é un reto, espero non decepcionar.

Cales son os obxectivos deste curso?

O meu obxectivo principal sería que o Conservatorio sexa de todos os verineses, que o viran como algo de todos, que servira de manantial de cultura para Verín, que non foramos un edificio cerrado, que a vila participe, xa que somos un centro municipal. Foi unha idea de Álvaro, o antigo director.

Funciona, nos últimos anos o Conservatorio creceu moito…

Si, temos que seguir esa idea de que a xente se vexa partícipe ou saque unha recompensa disto. Aquí hai moito traballo desinteresado por detrás.

Ese traballo é conxunto co Concello, directiva e Anpa. Parécelle beneficioso?

Por suposto. De feito este “bum” non sería nada sen a Anpa, porque os profes somos traballadores do Concello. Realmente quen consegue as cousas non é o director, é a Anpa, son moi esixentes, valen moitísimo e son moi traballadores. Ademais fano sen ánimo de lucro, todo por amor á música. Este ano, grazas a todo o traballo, temos o segundo grado de profesional e a Anpa organiza a celebración dos 30 anos de vida do centro.

Que é para vostede a música?

Para min a música é a vida, sería incapaz de vivir sen ela. A música estivo presente toda a miña vida, unhas veces por afección, outras por traballo, e agora non sei cando estou traballando ou en tempo de lecer, desfruto do meu traballo.

Que ensinanza lle gustaría ofrecer?

O amor polo ben feito, pola música ben feita. Hai que respectar a música, darlle ao público algo de calidade. É unha das pegadas que me gustaría deixar no meu paso polo Conservatorio de Verín.