A oposición de Vilardevós, os socialistas de Julio Prada, critican a xestión do Concello, encabezado polo popular Manuel Cardoso. “Non están aprobados os orzamentos do 2021”, apunta o portavoz do PSOE. Ante a crítica, o alcalde explica que “non os aprobamos porque non había secretaria, chegou en agosto. Podemos traballar sen telos aprobados, de forma prorrogada”.
Manuel Cardoso exemplifica a posibilidade de poder traballar sen os orzamentos aprobados lembrando a súa primeira lexislatura, no 2011. “Había secretario, pero non tivo tempo para facer os orzamentos, pasamos toda a lexislatura sen aprobalos, e traballouse igual, o importante é ter os cartos”, sinala, tranquilo fronte a crítica da oposición.
Cansado da “situación de declive” de Vilardevós, Prada asegura que “non é o problema da secretaria, é que o señor alcalde sempre ten algunha escusa para gastar o diñeiro ao seu gusto”. Dende o PSOE califican os orzamentos de “insolidarios” e remarcan que “non reflexan a realidade do noso Concello, foi un municipio punteiro en todos os sectores, agora non ten nada, dende que goberna o PP só se mira polos intereses dos que mandan”.
Respecto ao 2022, o popular asegura que teñen vontade de aprobar as partidas orzamentarias: “Temos idea de aprobalos, a secretaria xa está comezando a traballar neles”, algo no que confían os socialistas.
