A Xunta porá en marcha o próximo 30 de agosto un taller de competencias básicas de emprendemento para persoas de máis de 18 anos cunha idea de negocio que desexen desenvolver seguindo a filosofía “maker”. Estas sesións celebraranse no Polo de Emprendemento e Apoio ao Emprego de Ourense Centro Sur, localizado en Verín. Así o apuntou onte Margarita Ardao, directora xeral de Emprendemento e Apoio ao Emprego, acompañada de Gabriel Alén, delegado territorial da Xunta en Ourense; Yago Borrajo, xefe territorial da Consellería de Emprego e Igualdade, e José Luis Suárez, presidente da Mancomunidade de Monterrei.
Con estes talleres, o Goberno galego estrea o programa da Academia Makers, que nace para impulsar a capacitación para a creación de empresas na Eurorrexión Galicia-Norte de Portugal.
“A cultura “maker” constitúe un activo crucial para a sociedade e para o seu tecido empresarial e industrial”, remarcou a directora xeral, quen destacou as vantaxes desta metodoloxía, baseada “na idea de aprender sobre o que se fai e que permite democratizar o desenvolvemento de actividades e procesos innovadores que se levan na economía produtiva fomentando o espírito de innovación”.
Así, o primeiro curso gratuíto celebrarase no Polo de Verín -que dá servizo ás comarcas de Monterrei, A Limia, Baixa Limia, Caldelas, Trives e Viana- do 30 de agosto ao 22 de setembro, e as inscricións xa están abertas. É un obradoiro de competencias básicas de emprendemento a través do cal “calquera persoa emprendedora con interese neste mundo adquirirá coñecementos sobre cuestións como a presentación de empresas ante futuros inversores, a construción de modelos de negocio estables ou marketing”, concluíu Ardao.
