Riós acolle desde onte e durante esta xornada de sábado o Foro da Castaña que se celebra por vez primeira no marco do convenio asinado pola Xunta con este Concello para a identificación, vixilancia e promoción da xestión activa dos soutos tradicionais de castiñeiros e de frondosas autóctonas.
O director xeral de Planificación e Ordenación Forestal, José Luis Chan, acompañado do delegado territorial da Xunta en Ourense, Gabriel Alén, foi o encargado de inaugurar esta cita que ten como obxectivos o fomento da participación colectiva, o intercambio de información e establecer canles de comunicación entre os axentes que interveñen na cadea de valor do castiñeiro.
Este foro participativo de experiencias e novidades relacionadas coa recuperación dos soutos tradicionais, coas novas plantacións de carácter produtivo, ecolóxico ou recreativo,
ou cos procesos produtivos é unha das accións do acordo subscrito cuxa vixencia se prolongará deica finais deste ano. Un acordo que persegue facer fincapé na promoción das agrupacións de propietarios para a xestión conxunta sobre figuras de base asociativa, civil ou mercantil, así como na loita contra as doenzas do castiñeiro.
