O IES Xesús Taboada Chivite de Verín forma parte do programa Erasmus+ da Unión Europea. Recentemente, o centro foi anfitrión dun encontro de formación do profesorado para a planificación das mobilidades do proxecto de “intercambio de boas prácticas “Sharing4Caring”, no que participa un centro de Finlandia, de Hungría, de Italia e de Portugal, ademais do Chivite.
O tema principal do proxecto é o tratamento da diversidade e a inclusión de alumnado con necesidades educativas especiais e minorías étnicas, e dende Verín deron a coñecer nestas xornadas o programa de convivencia para a prevención da violencia e do acoso escolar, que se implementa no centro dende o 2016.
Ademais de traballar na formación, os profesores estranxeiros coñeceron a riqueza da contorna con visitas as instalacións de Cabreiroá e a adega Crego e Monaguillo.
Neste sentido, tras esta formación do profesorado, alumnos de 1º e 2º de Bacharelato do Taboada Chivite viaxarán aos países que forman parte do programa. En Italia tratarán o tema da inclusión dentro do ámbito escolar, en Finlandia formaranse sobre a relación que ten a escola coas institucións locais, mentres que en Portugal coñecerán a relación do alumnado coa propia escola e, por último, en Hungría enfocarán a mobilidade á relación de cada país con Europa.
