A Fundación Insua dos Poetas celebra o Día do Libro o próximo domingo cun modelo novedoso nun formato orixinal. O “Día do Libro na procura de… (Rosalía de Castro, Eduardo Pondal, Manuel Curros Enrríquez, Ramón Cabanillas, Castelao e Vicente Risco)”, consistirá nunha adaptación do popular modelo “Escape room”. Será entre as 10,30 e as 14,00 horas e de 16,00 a 19,30 horas.
Formaranse 6 grupos de 20 persoas cada un, que terán que resolver diferentes enigmas e pasar por diversas probas en escenarios distintos, adaptados ás devanditas figuras literarias representadas na Galería da Literatura Galega da Insua dos Poetas. O tempo dispoñible para cada grupo será de 50 minutos, durante os que 20 persoas deberán localizar un libro do autor ou autora correspondente. Cada grupo deberá interactuar conxuntamente para interpretar pistas e superar desafíos nun ambiente divertido e emocionante.
Entregaranse seis premios, que consistirán nun lote de libros máis un agasallo especial segundo a categoría acadada.
