O sábado día 5 de novembro celebrarase a segunda edición do Magosto na Insua dos Poetas. O éxito de participación do ano 2021 leva á Fundación Insua dos Poetas a organizar de novo esta tradicional festa, que estará especialmente dedicada ós nenos das comarcas do Carballiño e O Ribeiro.
“Trátase de ofrecerlles ós nenos e nenas das comarcas do Carballiño e do Ribeiro unha actividade tradicional, o magosto, adecuada ós tempos actuais, na que os máis pequenos sexan os protagonistas”, apunta o presidente da fundación, Luis González Tosar.
Nese sentido engade que “de aí o título e o espírito do II Magosto na Insua dos Poetas: “ Coas nenas e os nenos na lingua propia”.
A actividade conta co patrocinio da Deputación de Ourense, Xunta de Galicia e a participación dos concellos de Carballiño, Maside, Boborás e O Irixo.
O magosto é aberto ao público e comezará ás 16,00 horas na Insua dos Poetas, na Esgueva, en Carballiño. Os asistentes disfrutarán coa actuación musical de Pele Pau e a animación do Dj Tibu.
Ademais, haberá xogos infantís, atraccións ecolóxicas e lotes de libros. No apartado gastronómico, non poden faltar os chourizos asados, pan, bica e bebidas, xunto coas castañas asadas.