Cortegada foi de novo referencia da artesanía

O concello de Cortegada pechou este domingo a súa fin de semana máis importante do verán coa celebración da XIV Feira de Artesanía, un evento xa consolidado que contou con numerosos asistentes, postos e actividades ao longo de todo o día.

Ás 11,00 horas tivo lugar a inauguración da feira coa apertura dos postos de artesanía, das atraccións ecolóxicas e dos obradoiros infantís para que os máis cativos se comecen a convertir en artesáns o día de mañá.

Durante a mañá houbo paseos pola vila de Cortegada a bordo de vehículos ecolóxicos para todo aquel que o desexou. Ademais, non faltou a comida e a bebida, con degutacións de viño do Ribeiro e un xantar popular que contou con xarrete.

Á tarde celebráronse varias partidas de “paintball” tradicional e tamén dunha modalidade con auga, menos lesivo. Todo aderezado con actuacións de cómicos e a amenización musical da charanga Bicoia.

Presenza institucional

Tanto o delegado territorial da Xunta en Ourense, Manuel Pardo, como o presidente provincial, Luis Menor, acudiron á apertura da feira. Na súa visita puxeron en valor a celebración desta feira por parte do Concello de Cortegada.