Os empresarios asesóranse das axudas a pemes da Xunta

A sede da Mancomunidade do Ribeiro foi o escenario escollido para pechar o percorrido do Camiño de Futuro que fai a presentación do mapa de axudas da Xunta de Galicia para pemes, emprendedores e autónomos do sur da provincia. Na apertura participaron o presidente do GDR, Francisco José Fernández, e Patricia Argerey, directora de Gain, Axencia Galega da Innovación; mentres que trala presentación das axudas pecharon o acto a presidenta da CEO, Marisol Novoa, e o delegado territorial da Xunta, Gabriel Alén.

A presentación dos apoios correu a cargo dos representantes dos organismos da Xunta, e a súa utilidade foi contrastada posteriormente coa exposición de casos de pemes que acadaron os obxectivos de innovación e mellora nos seus proxectos empresariais como Viña Costeira e Renga Enerxía, exemplos ourensáns de innovación, competitividade e dixitalización en sectores tan distintos coma o agroalimentario, a biotecnoloxía e o deseño e enxeñería industrial, respectivamente.

O encontro congregou a membros do tecido empresarial, de entidades asociativas como a da Área Industrial de Carballiño e de organismos como a Estación de Viticultura de Galicia. Francisco José Fernández apostou por que as administracións públicas deben apoiar dende o inicio da actividade empresarial aos promotores de ideas innovadoras que aproveitan a riqueza dos recursos das comarcas do Carballiño e Ribeiro para asentar poboación, mellorar a economía local e favorecer o benestar social. Patricia Argerey sinalaba que todas as empresas teñen a capacidade de innovar, de facer as cousas dun xeito distinto, optimizar tempos e custos e posicionarse mellor nos mercados para poder sobrevivir.

Marisol Novoa recordou que a Confederación puxo en marcha dúas oficinas técnicas en Verín e O Barco e Gabriel Alén sinalou que é imprescindible “seguir potenciando o ánimo emprendedor e innovador de todos vós”.