Fidalgo: "os grupos políticos non temos ningunha información sobre ditos orzamentos, xa que aínda non nos foi presentado o borrador"
O voceiro do grupo Ribeiro en Común na Corporación de Ribadavia, Brais Fidalgo, asegura que "anunciar unha cuestión de confianza cos orzamentos deste ano aprobados, é a pior maneira de instrumentalizar a institución municipal para buscar réditos partidistas". O concelleiro refírese ó anuncio feito polo alcalde, o socialista Ignacio Gómez, de plantexar unha moción de confianza vencellada á aprobación dos orzamentos municipais de 2017.
Fidalgo engade, ó respecto, que "os grupos políticos non temos ningunha información sobre ditos orzamentos, xa que aínda non nos foi presentado o borrador, e enterámonos pola prensa de dita intención". Por este motivo, anuncia que solicitará do Concello a entrega dunha copia da proposta económica para o vindeiro ano.
