Xornadas de portas abertas nas adegas da Ruta do Ribeiro

A Ruta do Viño do Ribeiro, de acordo co resto de rutas dos viños de Galicia e co apoio da Axencia de Turismo de Galicia, decidiu manter a celebración das Xornadas de Portas Abertas os días 23 ao 25 de outubro, Durante esta fin de semana as adegas participantes na Xornada ofrecen visitas guiadas con degustación ás 11,30, ás 13,00 e ás 17,00 horas do sábado e ás 12,00 horas do domingo. Para facer as visitas é imprescindible a cita previa.

Adegas Celme organiza sendos obradoiros, sobre a elaboración de vermú artesanal e para analizar as características e cata posterior coas variedades identificadas. Cuñas Davia, propón unha cata comentada e Casal de Arman ofrece aos visitantes unha cata vertical. Tamén Genuine Galicia, especializada en rutas turísticas, ofrece visitas gratuítas no casco histórico de Ribadavia.

O Museo do Viño de Galicia recibirá visitas tanto individuais como de grupos e complétase a oferta enoturística cos menús maridados que presentan os restaurantes asociados a esta ruta, unha combinación perfecta de gastronomía local con viños de calidade.

A oficina de Turismo de Ribadavia, permanecerá aberta en horario de 10,00 a 14,30 horas e de 16,00 a 19,00 horas o sábado e de 10,00 a 14,30 o domingo, como punto de información.