O Campus de Ourense acolleu onte a asemblea xeral do proxecto europeo Wheatbiome. Os socios desta iniciativa déronse cita para facer balance dos seus avances no reto de deseñar novos alimentos e sistemas agroalimentarios empregando o potencial microbiano e centrándose no caso do trigo. Na iniciativa participan 13 institucións de Hungría, Polonia, Lituania, Holanda, Portugal e España, entre elas, a Universidade de Vigo.
A asemblea celebrouse na Facultade de Ciencias e contou coa participación de arredor de 40 investigadores. Expuxeron o estado de execución de cada liña de actuación do proxecto, segundo detallaron fontes universitarias, e tamén tiveron a oportunidade de coñecer o Instituto de Agroecoloxía e Alimentación do Campus. Unha das coordinadoras de Wheatbiome, Rosa Pérez Gregorio, pertence á Universidade de Vigo.
