A Deputación de Ourense promove a Vía da Plata durante a Semana Santa

A Deputación propón para esta Semana Santa descubrir o patrimonio da provincia a través do itinerario xacobeo “Vía da Plata-Camiño Mozárabe”. Esta proposta facilitará aos peregrinos a realización desta ruta por etapas e permitirá acreditar a “Compostela”. O programa, a través do Inorde, inclúe un servizo de autobús que partirá desde Ourense cada día para ir ao punto de inicio da etapa e retornará ao remate da xornada.

A primeira etapa, o 26 de marzo, levará aos peregrinos de Ourense a Cea (21 kms), desprazándose despois ata o mosteiro de Oseira. A segunda etapa irá de Cea a Piñor, pasando por Castro Dozón ata Puxallos (22 kms). Ao seguinte día o tránsito será de Puxallos a Silleda (22 kms); a cuarta etapa levaraos de Silleda a Vedra ou a Susana (23km/30km); e o 30 de marzo culminarase a peregrinación cun tramo de 10 quilómetros desde Susana ata Santiago.