A Fundación Otero Pedrayo entregará este sábado o Premio Trasalba 2020 a Manuel G.Buciños. Este acto, que fora adiado pola pandemia, celebrarase ás cinco da tarde coa presenza exclusiva de familiares e achegados, membros da fundación e medios de comunicación. Buciños é o galardoado nesta edición tras adicar toda unha vida a esculpir ducias de pezas, conformando un estilo propio ben definido e posicionándose como un dos principais renovadores da arte galega contemporánea.
Ademais, durante o mesmo día e tamén en Trasalba, levarase á cabo ás 18,30 horas unha reunión ordinaria do pleno do patronato da fundación, onde figura entre os puntos da orde do día a elección do seu novo presidente. Ámbalas dúas actividades celebraranse ao aire libre ou no seu salón de actos en función da climatoloxía.
Xaquín, o primeiro
A Fundación Otero Pedrayo, creada por mandato testamentario do propio escritor galego, encárgase de manter e difundir o legado deste autor e os demais persoeiros da xeración Nós, coma Losada Diéguez, Castelao e Vicente Risco. Co premio Trasalba, unha das súas principais iniciativas, veñen recompensando ininterrompidamente a traxectoria de diversas figuras da arte desde 1983, cando foi premiado Xaquín Lorenzo.
