Os V Premios de Investigación do Colexio de Economistas de Ourense galardoan a capacidade creativa da provincia e a cooperación nos diferentes ámbitos
Os V Premios de Investigación do Colexio de Economistas de Ourense - Facultade de Ciencias Empresariais e Turismo de Ourense- destacan a capacidade creativa da provincia e a cooperación nos diferentes ámbitos, público, privado e académico. No acto de entrega dos premios que tivo lugar na Aula Magna "José Ángel Valente" da FCETOU, participaron o presidente da Deputación de Ourense, Manuel Baltar; a decana da facultade, Elena Rivo; o decano do Colexio de Economistas, Guillermo Díez, e o conselleiro delegado de UNVI, Eloy Pérez, quen ofreceu un relatorio sobre a traxectoria e a experiencia de éxito da súa empresa familiar.
O presidente da Deputación de Ourense describiu o acto no que defendeu a Ourense como “un territorio de innovación e ideas de éxito, que nos caracteriza como terra emprendedora”.
Na clausura do acto, o presidente do goberno provincial expresou aos alumnos da facultade “a relevancia das empresas punteiras que temos na provincia de Ourense, por iso, falar de economía é importante, pero máis aínda o é falar das persoas, dos emprendedores que fixeron e fan posible que proxectos de éxito empresarial ideados, desenvolvidos e impulsados desde Ourense sexan unha realidade en moitas partes do mundo”. Manuel Baltar citou exemplos de cooperación como o que mantén a Deputación coa CEO no marco do Plan Exportou para colaborar na internacionalización de empresas ourensás, e tamén remarcou a importancia de contar co Observatorio Económico Ourensán e co Inorde, “instrumentos de apoio e guía para ao emprendemento e o desenvolvemento empresarial na nosa provincia”.
O presidente rematou afirmando que a Deputación “estará sempre ao carón de propostas que redunden no beneficio de Ourense” e animou aos alumnos a seguir “no camiño da investigación, o traballo e a creatividade”.
Como colofón ao acto tivo lugar a entrega dos galardóns de Fin de Grao, unha convocatoria na que colabora anualmente a Deputación de Ourense e que este ano premiou traballos referidos á vivenda, aloxamento hoteleiro, control de xestión, marca “Q” de calidade turística e competencia.
O primeiro premio no Grao en ADE foi para Iván Míguez Álvarez polo traballo “Factores determinantes do prezo da vivenda da cidade de Ourense”, e os accésit neste grao foi para Estefanía Hermida Hermida por “Jefes de servicio y sistemas de control de gestión”, e para María Teresa Cid Morales por “La colusión y los acuerdos horizontales”. No que atinxe ao Grao en Turismo o primeiro premio foi para Andrea García González por “Estudio sobre la aplicación del Capital Intelectual en las empresas de alojamiento hotelero de alta categoría en Galicia”, e o accésit para Sofía Díaz Caride por “La imagen de la marca "Q" de calidad turística”.
