Miguel Santalices: “Galicia xógase manter unha unión dentro do estado español”

O presidente do Parlamento galego e número catro do PP na provincia, Miguel Santalices, explica que xógase Galicia o domingo e cales son as claves das eleccións.

Que sensación tes fronte as eleccións do domingo?

Sinto que o meu grupo nesta provincia está traballando moi intensamente, tamén teño a sensación de que os cidadáns precisaban acercarse e que se lle explicaran algunhas cousas nas que había certa confusión e creo que nesta campaña está a facerse un traballo interesante.

Que había que explicar?

Como determinadas cousas a nivel nacional poden ter unha repercusión importante na nosa comunidade. Por exemplo, condonación de débeda ou algunha xestión que se está a facer na que se separa o Estado español, o cal ten unha repercusión grande en temas tan importantes como a solidariedade nacional en pensións ou no sistema sanitario. Ademais, eles queren un sistema de financiamento baseado nos balances fiscais fronte a nós que queremos que estea baseado nos dereitos dos cidadáns.

Que se xoga Galicia o domingo?

Manter unha xestión adecuada de servizos públicos como educación ou sanidade e estar dentro dun Estado e seguir mantendo o sentimento de ser galego, español e europeo. Polo que Galicia xógase un futuro a nivel de xestión de servizos básicos e que manteñamos unha unión dentro do conxunto do sistema español.

Como chega o PP ao 18F?

Nun momento de moita reflexión a nivel nacional porque vemos o que está pasando e ante isto o PP chega cun discurso claro que é moi trasladable a comunidade autónoma. Ademais, temos un presidente en Galicia como Rueda que fixo unha xestión moi acertada, ten unha gran proximidade e chega nunha etapa de gran ilusión para seguir facendo as cousas con sentidiño e explicando ben que as cousas que se prometen deben ter un respaldo orzamentario.

Que papel vai xogar Ourense?

Xoga un papel decisivo no resultado final porque é unha provincia que sempre respondeu maioritariamente apoiando ao PP. Ourense vai ser clave para que teñamos os 38 escanos necesarios para gobernar con maioría absoluta. Ademais, a provincia xógase consolidar aspectos nos que somos pioneiros, temos un recurso importante que é o termalismo, xa que temos auga con propiedades curativas e hai determinadas patoloxías nas que resulta ser o tratamento de elección que pode prescribir un especialista. Necesitamos que iso sexa incluído na carteira de servizo do Sistema Nacional de Saúde.

Se non acadan os 38 escanos o domingo, con que partidos están dispostos a pactar?

Eu non vexo ese escenario, somos un partido de base humanista que ten un abanico moi grande dentro do sentimento galeguista e non contemplo que teñamos necesidade de pactar. A xente ten suficiente sentidiño para saber que non tódalas eleccións son iguais e que nun momento determinados necesítase unha seriedade e xestión avalada.

Cre que o BNG se equipara a partidos como Junts ou Bildu?

O que está a facer indica que vai nesa liña. Eu escoitei que aquí se fala de ir cara a unha creación propia na Garda Civil e na Policía e botar os que están agora, ese é un síntoma inicial de que se quere configurar unha independencia dentro do Estado español. O BNG quere ir por unha liña de independentismo e creo que a sociedade galega non o percibe como algo positivo, mais ben todo o contrario.