Audiovisual

Ourense volve ser plató de cine cunha comedia poscovid

"Cuñados" comeza a rodaxe este luns nun proxecto con "moita ourensanía" que verá a luz en 2021

Unha comedia criminal en tempos de virus.  "Cuñados", a primeira longametraxe de ficción da produtora galega Portocabo, desembarca en Ourense cun equipo con moita "ourensanía" e unha rodaxe que, a partir do luns, continuará a estela de colocar a provincia como plató de cine con localizacións diversas na provincia. O equipo audiovisual presentou onte no Liceo os detalles deste proxecto, unha comedia costumbrista e familiar sobre as peripecias criminais de tres cuñados unidos polo azar. De telón de fondo, o Clube Ourense Baloncesto xógase o ascenso ao Play Off contra o Breogán. A inspiración non é casual: os recordos de "ourensanía" de parte dos implicados dan forma a esta película ilusionante que se estreará no 2021. A cinta forma parte do grupo de películas seleccionadas na segunda mesa de valoración de cine de RTVE para este ano.

O ourensán Alfonso Blanco "Fosco", produtor, confesou a súa alegría por "voltar á terra despois de anos de rodaxe por aí adiante". Para o responsable de Portocabo, a longametraxe "ten moita ourensanía". "Esperemos que sexa a gran comedia galega", engadiu.Tamén ourensán, Toño López, ompartiu a ilusión por voltar á terra coa que é a súa primeira película. "Estou coma un neno con zapatos novos", dixo.

A actriz ourensá Eva Fernández enxalzou á "terra da chispa". Ao humorista de Carral Xosé Antonio Touriñán tocoulle tirar de retranca e confesarse tamén "ourensán".

Apoio da Deputación

Manuel Baltar, presidente da Deputación de Ourense–a entidade apoia a película–destacou a aposta da entidade provincial por "continuar na liña de aposta polas producións audiovisuais en Ourense" e recordou que o Ourense Film Festival cumpre 25 anos nesta edición.  Jacobo Sutil, director da  Axencia Galega das Industrias Culturais (Agadic), destacou a "calidade e a labor de Portocabo difundindo a noso audiovisual a nivel galego, español e internacional".

"Ao ser esta unha película moi conectada ao espazo no que sucede, o equipo atopou neste territorio de contrastes as localizacións ideais. Nel conviven o rural e o urbano, o moderno e o tradicional", engaden dende  a produtora. 

Toño López: “Non podo explicar a miña ilusión de rodar na terra"

Cuñados" é a primeira película do ourensán Toño López. Non é novo na industria: dirixiu series de éxito internacional como "Miracle Tunes" ou "Auga Seca". 

ma_200814_131_resultado

Tiña claro que ía ser unha comedia?

Si. O proxecto xa estaba encamiñado, a comedia é unha cousa que me atraía.

O da retranca galega empézase a “pillar" fóra de Galicia?

Penso que si, que a retranca galega non se entende de todo fóra pero é atractiva. Se lle collen a metade ou un 20%, xa é interesante. Aínda que perdan algo.

Que é Ourense para vostede? Cales son os seus recordos?

Eu nacín aquí, pasei a miña xuventude e estudei aquí. Os meus mellores amigos seguen aquí, aínda que teña máis polo mundo adiante. A miña tropa é de Ourense. Non podo explicar a ilusión que me fai vir á miña terra, a Ourense, a rodar esta película. 

Parece que nos últimos anos Ourense e Galicia están en primeira liña audivisual.

Dende hai moito tempo, non sei por que exactamente. Sería longo de explicar. En Galicia sempre houbo máis series que noutras rexións de España. A xente que empeza a traballar aquí despois ten éxito no resto do país. Hai moitos directores e profesionais en Madrid ou Barcelona que son galegos e son famosos por ser galegos. Agora a televisión tradicional está nun momento de cambio e as plataformas audivisuais collen forza. Por algún motivo, os galegos están en primeira liña tamén nestas plataformas.

O reparto é un plus na cinta?

O proxecto é dobremente interesante polos actores que están aí. O guión é moi bo e iso é fundamental, pero despois ter actores de primeiro nivel coma toda esta tropa que temos na película é unha garantía de que vai ser fantástico.

Co covid é máis necesaria a comedia?

Si. Necesitamos rirnos. Son circunstancias difíciles e está sendo duro. Fai falla rir e a xente nas súas casas tira de comedia para desfogar un pouco e relaxarse. Esperemos que esta comedia novase faga cando o do covid remate e a xente saia a rúa e a desfrute sen máis. 

Te puede interesar