A líder do bloque define a Luis Seara como o alcalde que porá fin ao "escándalo democrático" que vive Ourense
A portavoz nacional do BNG, Ana Pontón, pediu unha mobilización masiva para votar ao BNG e abrir “un tempo novo de dignidade e rexeneración democrática con Luís Seara”, no transcurso do mitin central da formación no anexo do pavillón dos Remedios, no que tanto Seara como a líder nacionalista avanzaron que Ourense vive “a conta atrás” para contar cun alcalde nacionalista tralo 28M.
Ana Pontón lamentou a “dexeneración democrática” que supón o “caciquismo 2.0 ”do PP, co presidente dos populares na provincia, Manuel Baltar, “á cabeza”, mentres Feijóo e Rueda “miran para outro lado”, e advertiu que haberá alianza con Jácome se Baltar o precisa, aínda “a costa de volver sacrificar á cidade catro anos máis e que, igual que fixo Feijóo no 2019”, xa ue o PP é unha “gaiola de grilos” e Rueda é “quen menos manda”.
Fin ao "esperpento"
Pontón sinalou que “ningunha persoa que quere un cambio real e leva Ourense na cabeza en no corazón pode quedar na casa” para así poñer fin ao “esperpento” no que se ten convertido o Concello, grazas ao “abrazo da vergoña” entre o PP e o alcalde “letal”, “todo para que Baltar seguise ocupando a poltrona da Deputación”. Se os ourensáns “enchen” as urnas con papeletas do BNG, dixo Pontón, terán o poder de “acabar co escándalo democrático dun PP que usa as institucións como se fosen a súa finca particular; de deixar atrás a páxina máis triste da historia recente de Ourense e de devolverlle a dignidade á cidade abrindo un tempo novo liderado por Luís Seara, cun proxecto solvente, serio, democrático e de futuro para esta cidade que lle devolverá a cidade aos seus verdadeiros donos: os veciños”.
Pontón, que denominou como “Fitipaldi Baltar” ao presidente do PP ourensán, afeou a Feijóo e Rueda o seu silencio ante um “perigo para as persoas” e que está “enlamando o prestixio desta cidade e desta provincia”. Así llo dixo ao numeroso público, instándoos a poñer fin ao “disparate do desgoberno municipal”.
