Rafael Rodríguez Villarino saíu claramente reforzado das primarias socialistas do domingo. O día despois do seu triunfo, pon o foco nas próximas eleccións municipais onde o PSOE buscará acadar o “cambio político, tanto na cidade como na provincia”.
Como se sinte ao saír refrendado pola maioría da militancia?
Máis alá da porcentaxe de apoio, quero destacar a amplia participación, do 79% na provincia e do 83% na cidade. Isto demostra que o partido ten un proxecto compartido. Este proxecto é o que viñamos dicindo na campaña: pasar de ser un partido sobresaínte, de “9”, a un partido excelente que chegue aos 10 concelleiros na cidade e na deputación que posibiliten un cambio político.
Durante toda a campaña falou de integración. Empezaron os contactos cos membros da candidatura de Alfredo García para conformar a nova cúpula provincial?
A creación da nova executiva aínda non arrancou. Si hai contactos, dirixidos a unha candidatura da integración que non se caracterice pola pola imposición dunha lista senón que se basea no diálogo cos actores para tratar de ter unha visión ampla e chegar ao maior número posible de militantes, todos concordantes co mesmo proxecto pero respectando a visión de cada un.
Nas primarias galegas, vostede apoiou a candidatura de Gonzalo Caballero. Como é a súa relación con Valentín González Formoso?
É unha relación cordial e fluída. Nos contactos non hai ningún tipo de diverxencia e ante todo, o mesmo que dicíamos nas primarias de Ourense, se un se considera demócrata ten que aceptar os resultados que saen dela. Ademais, tamén son fiel ao meu partido. Dende sempre foi unha relación moi boa, incluso durante á campaña das primarias galegas, cando acudín ao acto que fixo en Ourense ao ser o secretario provincial e nunca houbo malestar ou confrontación algunha.
Espera lograr unha candidatura de consenso na agrupación local da cidade?
Esa é unha aspiración que temos de sempre. Un consenso maioritario permitiría evitar un proceso de primarias, que non están mal, pero xeneran un traballo que se pode evitar cun acordo previo. Vou poñer todos os medios para que sexa posible e, de lograrse, creo que tanto o partido coma a cidadanía sairán beneficiados porque comezaremos antes a traballar nun proxecto político para a cidade.
Volverá ser o candidato á alcaldía de Ourense?
Creo que o PSOE xa debería estar gobernando, tanto na cidade como na provincia, ao gañar con máis de 2.000 votos de diferenza. Se non o está é porque se deu un pacto entre dúas formacións que eran inimigas e incluso se detestaban entre elas. Por iso o noso proxecto está sendo adiado. Claro que me gustaría levar a cabo ese proxecto que quedou cercenado dende un primeiro momento, pero, como digo sempre, xa cruzaremos o río cando cheguemos á ponte. Hai moito que falar ata alí e o importante agora é estar unidos. A partir de aí, todo é posible.
