A Ribeira Sacra pide un desexo polo seu 900 aniversario: ser Patrimonio da Humanidade

Transcorreron 900 anos dende que se mencionou por primeira vez o termo "Rovoyra Sacrata". Foi nun documento datado o 21 de agosto de 1124 en Allariz. Nel a raíña Tareixa de Portugal, xunto co conde Fernando Pérez e co seu fillo Alfonso Enríquez, doaban ao Mosteiro de Santa María de Montederramo o lugar de “Rovoyra Sacrata”, cuxos termos se delimitan no territorio de Caldelas.

Nove séculos despois, o Consorcio de Turismo da Ribeira Sacra celebrou o aniversario deste primeiro recoñecemento documentado do territorio. Foi nun acto institucional no Mosteiro de Montederramo no que se repasou a historia do lugar, se puxo en valor a riqueza do entorno e se manifestou o desexo por conseguir o recoñecemento da Unesco como patrimonio da humanidade de cara ao 2026.

O pasado mes de abril, o Consejo del Patrimonio Histórico, o órgano de coordinación do Goberno central e as comunidades autónomas, daban a coñecer a decisión unánime de que a candidatura "Paisaxe da auga: Ribeira Sacra" sexa a proposta de España para conseguir a declaración de Patrimonio da Humanidade por parte da Unesco no vindeiro ano 2026, o que abriu un novo horizonte na liña de traballo que a Xunta de Galicia puxo en marcha no ano 2017.

“A Ribeira Sacra ten os deberes feitos e ten a candidatura novamente ordenada para ser declarada Patrimonio da Humanidade en 2026”, sinalou Luis Fernández, presidente do Consorcio de Turismo. Na mesma liña tamén se pronunciou o presidente da Deputación de Ourense, Luis Menor, quen insistiu en que “se algún territorio merece esta declaración é a Ribeira Sacra”. “Invitaría aos que van avaliar a candidatura a que se sentasen aquí a contemplar a súa beleza. Estou seguro de que o imos conseguir”, apuntou.

María del Carmen Martínez, directora xeral de Patrimonio Cultural, sinalou os pasos a seguir en vista de potenciar a adquisición do título: “Estase traballando na renovación do expediente, en 2025 presentarase o documento definitivo que será obxecto de avaliación, para en 2026 poder ser presentado ao comité de Patrimonio Mundial”. Con todo, insistiu en “valorar o que xa temos” porque é “extraordinario”, aínda que, coma todos, considera que o lugar “merece ese recoñecemento”. Menor reflexionou tamén sobre a oportunidade que representa este enclave para Ourense. “A Ribeira Sacra é unha marca de primeira categoría, con moita historia, pero tamén con moito futuro”, destacou e fixo tamén unha chamada de concienciación para salvagardar a riqueza deste territorio. “Temos recursos finitos. O reto é mellorar e conservar a Ribeira Sacra”.