O Concello de Taboadela sacou a concurso este luns as obras de reforma da antiga casa reitoral do municipio, que acollerá a futura Casa da Cultura municipal. Este é un dos proxectos estrela do mandato do actual alcalde de Taboadela, Álvaro Vila (PSOE), e estarán cofinanciadas ao 80% pola Deputación.
A iniciativa deu os seus primeiros pasos en decembro de 2019, cando o Concello chegou a un acordo co Bispado para adquirir este edificio. Este proxecto permitirá dotar ao municipio dun espazo cultural e de participación cidadá, incluíndo un servizo de biblioteca e de medios materiais didácticos para que os máis cativos poidan participar en obradoiros e actividades recreativas.
O contrato recoñece que o estado de conservación da edificación é “deficiente” dada a súa antigüidade (de máis de 100 anos) e tamén, debido ao “abandono da mesma” atópase nun estado ruinoso con necesidade de ser reformada.
O prazo de execución inicial é de dous anos dende a concesión da obra, deixando a porta aberta a unha ampliación que adiaría o remate dos traballos un ano e medio máis. Deste xeito, as melloras recollidas no proxecto están divididas en dous capítulos: por unha banda están as actuacións no almacén anexo, onde se retirará a vexetación que a invade e se porá unha cuberta nova. Pola outra están as actuacións no propio edificio, entre as que se atopan a demolición de soleiras ou da escaleira, o saneamento dos muros de pedra existentes ou a readaptación do inmoble ao seu futuro uso.
