O Consello de Goberno aproba novos criterios de reparto axustados ao novo
Plan de Financiamento do Sistema Universitario de Galicia.
Algo máis de 2.400.000 euros destinou no 2015 a Universidade de Vigo a financiar as 21 escolas de facultades que a compoñen. Na procura dunha maior obxectividade e transparencia, pero tamén motivado polos cambios introducidos pola Xunta de Galicia nos criterios de reparto de fondos no novo Plan de Financiamento do Sistema Universitario de Galicia 2016-2020, o Consello de Goberno aprobou unha revisión e actualización dos criterios para o financiamento dos centros propios, que obteñen os seus ingresos a través dos contratos-programa e do financiamento estrutural.
Este foi un dos acordos aprobados polo Consello de Goberno, que tamén deu luz verde ao Programa para captación de persoal investigador seleccionado nas convocatorias do Consello Europeo de Investigación (ERC), que ofertará dous contratos de cinco anos de duración para persoal investigador de moi alto nivel, beneficiario dos programas Starting Grants, Consolidator Grants e Advanced Grants do ERC.
Na sesión, o reitor deu conta no seu informe dos avances rexistrados nos últimos meses para poñer en marcha nas instalacións da ETEA a sede corporativa de Campus do Mar. Mato lembrou o máis destacado dunha tramitación que comezou hai catro anos e que trala proposta da Universidade á Xunta dunha cesión de terreos e inmobles a longo prazo formulada hai un ano, entrou nunha nova fase coa oferta realizada pola institución académica a Zona Franca para participar no proxecto.n
