As Portas do Xurés estarán abertas toda a Semana Santa

As Portas do Xurés estarán abertas do 17 ao 20 de abril, así como nos meses de verán deste ano e do vindeiro, dentro do Proxecto Gerês-Xurés Máis Sustentável.

Estarán operativas cinco días á semana durante os meses de maio, xuño, xullo e agosto deste ano, no horario de mércores a domingo de 10,00 horas a 14,00 horas e das 16,00 horas ás 20,00 horas, malía que os luns e martes permaneceran pechadas. No caso do ano 2026, as Portas do Xures estarán abertas nos meses de xuño, xullo e agosto co mesmo horario do ano 2025.

O contrato para a apertura das Portas e a realización de actividades foi adxudicado á asociación Sustinea durante estes dous anos.

O Proxecto Gerês-Xurés Máis Sustentável, no que participa a Deputación de Ourense cun orzamento de 435.000 euros, e está cofinanciado ó 75% co programa Interreg VI España-Portugal 2021-2027, a través do Fondo Europeo de Desenvolvemento Rexional.

Tamén participan outras entidades e administracións públicas tanto galegas como portuguesas con competencias na xestión do territorio da Reserva da Biosfera, procurando novos patróns de sustentabilidade ó recuperar e por en valor o patrimonio material e inmaterial da mesma, ofrecendo mellores servizos ós turistas no marco do turismo ecolóxico e sostible.

As Portas do Xurés

Estes centros de interpretación están encargados de dar a coñecer ós visitantes da Reserva da Biosfera o patrimonio da zona. Sitúanse nos seis concellos que forman parte do Parque Natural Baixa Limia – Serra do Xurés.