Entrimo reivindícase como o epicentro do triángulo da raia seca

O acto de entrega de premios Arraiano Maior revindicou onte Entrimo como o epicentro do triángulo máxico da raia seca, cuxos vértices marcou Xosé Luis Méndez Ferrín en Celanova, Montalegre e Arcos de Valdevez. A Porta do Parque situada na Terrachán acolleu un acto cheo de emocións, recordos e de recoñecemento a grandes figuras que traballaron e traballan na defensa da cultura que une Galicia e Portugal.

A cantante Uxía recibiu o recoñecemento como Arraiana Maior 2024 polo seu traballo de establecer pontes coa cultura lusofonía, a Fundación Rosalía de Castro representada por Anxo Angueira polo labor como colectivo, mentres que Xusto Beramendi, galego de adopción, foi recoñecido como Arraiano Universal a título póstumo nun acto presidido polo alcalde, Ramón Alonso, e co director e xornalista Aser Álvarez como mestre de cerimonias.

Honrada e emocionada por recibir a aguillada, Uxía incidiu na importancia de seguir traballando para afianzar a irmandade entre Galicia e Portugal, “e a música, as artes en xeral, son unha ferramenta poderosa para poder facelo”, dixo tras recoller o premio, nesta ocasión simbólica, da man do seu antecesor Antoine Chao quen desta vez non se puido desprazar ata Entrimo, pero desculpou a súa ausencia con emotivo audio.

Tras o acto oficial, no que se conmemorou o 15 aniversario do premio que estreou o ‘xefe’ Méndez Ferrín, os presentes trasladáronse ata ao Museo Pura Santos para a inauguración da mostra “Vieiro a Prisciliano” de Correa Corredoira. A mostra poderase visitar todo o mes.