O Son do Arnoia leva a Molgas música doutras décadas

O Festival Son do Arnoia regresa ca súa cuarta edición o vindeiro 1 de agosto ó Parque Ansuiña, na localidade de Baños de Molgas, para achegar ós asistentes versións da música de décadas pasadas, segundo explica Jose Manuel Rodríguez, presidente da Asociación de Veciños de Baños de Molgas, encargados de organizar este evento.

O presidente apunta que a financiación se consegue a través de diferentes propostas que a asociación realiza ó longo do ano, para crear “un evento con grupos que versionen música dos 80 e dos 90, onde todo o mundo sepa as cancións para poder cantalas e bailalas”.

Esta edición ccontará ca participación dos grupos Doc Magoo’s, Broken Peach e En Mala Hora, que faran as delicias dos molguenses e dos visitantes nunha noite pensada para recordar.

Esta cita, consolidada xa como un dos eventos do verán na comarca, atrae a veciños de toda a provincia, segundo explica Jose Manuel, xa que “estes grupos teñen os seus propios fans e a xente desfruta moito con eles”.

A velada comezará cunha cea popular, “aberta a todo mundo”, e que contará con empanada variada, lacón cocido, churrasco mixto con ensalada, bica, viño, refrescos, café, e como non, chupitos. O prezo é de 20 euros para os adultos e de 12 euros para os cativos de 6 a 12 anos, os máis pequechos poden asistir de balde. Pódese reservar nos bares da localidade ata o 30 de xullo.