O Concello fai unha limpeza a fondo no campo da Uceira

A concellería de Deportes de Carballiño desenvolveu durante a xornada de onte os traballos de mantemento do campo de herba artificial do campo de futbol da Uceira. Consistiron nunha limpeza integral de toda a superficie do terreo de xogo e zonas de banda e banquillos, para eliminar tódolos residuos que durante os últimos anos se foron acumulando, cunha maquinaria especial para este tipo de labores. Desta forma consiguese osixenar o campo para, posteriormente, colocar o caucho necesario que lle devolverá a estas instalacións deportivas ó seu estado perfecto para a práctica de deportes.

O concelleiro responsable deste departamento municipal, Manuel Dacal, considerou que era imprescindible realizar estes traballos canto antes, "xa que nos últimos anos non se fixeron e este tipo de instalación require dun mantemento periódico", sinalou.

Estas instalacións deportivas da Uceira son empregadas ó longo do todo o ano por moitos deportistas da vila, entre eles, preto de 200 rapaces da Escola Municipal de Futbol, así como equipos de outras ligas, como a dos veteranos, polo que Manuel Dacal apuntó que "son as instalacións deportivas municipais con maior demanda e, polo tanto, as que maior atención deben ter por parte dos responsables municipais".