O Nadal de este ano trae varias novas propostas a Carballiño

Os veciños do Carballiño poderán desfrutar dunha variada oferta teatral, cine, concertos, maxia e monólogos de humor, ademais de citas tradicionais como a visita de Papá Noel ou a cabalgata de reis. “Temos novidades como as prebadaladas na tarde do día 31 de decembro, que esperemos que teñan moito éxito”, avanzou o edil de Cultura. A programación comeza o 1 de decembro co acendido da iluminación festiva polas rúas da vila.

Entre outras actividades, o concelleiro destacou: o concerto das Guerreras K-Pop o 4 de decembro no Auditorio Municipal, o concerto do grupo Bombai o 5 de decembro, a obra “Bichitos” da compañía Spasmo Teatro o 8 de decembro, o espectáculo “Retranca e maxia” de Luis Boyano o 14 de decembro e o monólogo de Agustín Jiménez o 18 de xaneiro. Fixo unha mención especial á cabalgata de reis, “Na cabalgata teremos moitas sorpresas, como é habitual”, destacou. Tamén recordou que haberá actividades complementarias durante decembro e xaneiro, como a pista de xeo na pista vermella ou as exposicións fotográficas de O Potiños en diversos puntos da vila.

Como apoio ao comercio, o alcalde, Francisco Fumega, avanzou a campaña de bonos do Concello para incentivar as compras locais. “É un xeito de prolongar as vendas máis alá da época do Nadal”, explicou. No pasado pleno aprobouse unha modificación de crédito de 30.000 euros para poñer en marcha a campaña, que en pasadas edicións contou cunha elevada participación veciñal.