As piscinas de Carballiño abren este sábado ao público con control de aforo

As piscinas municipais do Carballiño comezan hoxe sábado a tempada de verán e o farán cun control de aforo para garantir as medidas de separación e seguridade. Para isto, o céspede estará delimitado en cuadrículas, co obxectivo de que os usuarios poidan dispoñer de espazos acotados coa debida separación para evitar posibles contaxios.

Neste sentido, pídese que as persoas que non formen parte da mesma unidade de convivencia, respecten as normas de separación entre usuarios.

Aínda con este control de aforo, non se prevé que haxa problemas de entradas, pois a cota máxima de usuarios nun só día en anos anteriores foi de 700 persoas, e o aforo permitido, tendo en conta todas as normas de separación, supera ampliamente os 1.000 usuarios.

O horario de apertura será de 11,00 ás 20,30 horas, de xeito ininterrumpido, durante todos os días da semana.

Os prezos da entrada permanecen invariables con respecto ao pasado ano. Así, para as persoas con idades entre os 4 e os 16 anos, será de 1,60 euros. Mentres que para as persoas maiores de 16 anos, será de 2,60 euros. Na taquilla das piscinas poderanse adquirir tanto as entradas diarias como os bonos de 15 e 30 usos, que non teñen que ser consecutivos, e tamén os de tempada.