O remate da semana dos nenos no Carballiño coincide co inicio do Pulpo

O Carballiño pechaba onte a Semana Grande para pequenos do municipio. Unha variada proposta de actividades lúdicas de balde para as familias que incluiron festa da escuma, inchables, deportes ou xogos acuáticos. O balance é “moi positivo, tanto de asistencia como de valoración das familias”, asegurou o concelleiro, Diego Fernández, quen resaltou a participación de poboación doutros municipios da comarca e de Ourense. “As actividades non paran, rematou a Semana Grande pero a programación cultural e a oferta lúdica para a cativada continúa”, dixo Fernández.

A vila comeza esta semana a 63 edición da Festa do Pulpo, coa participación o domingo de milleiros de persoas na romaría do Parque Municipal. Antes, o martes ás 20,00 horas na Praza Maior, terá lugar a elaboración da tapa de pulpo máis grande do mundo. Nesta 15ª edición, o reto está en cortar 600 quilos de pulpo, 10 máis que o ano pasado.