As Xociviga deron o seu premio á curta “A summer’s end poem”

O Festival Internacional de Curtametraxes “Xociviga Ano 0” chegou ao seu fin este domingo despois de catro días nos que se proxectaron preto de 50 traballos audiovisuais, e fíxoo coa entrega dos galardóns aos premiados.

No apartado de mellor videoclip galego, outorgado tras unha votación por redes sociais, o gañador foi “Esto es Sunwalk”, dirixido por Enrique do Rosario e Javi Sega.

O premio do público á mellor curtametraxe, cunha nota media na votación de 8,67, foi para “Volcelest” de Éric Briche, a curta de animación francesa que xa pasara con éxito polo Festival Internacional de Cannes.

Un xurado xove foi o encargado de valorar a recoñecer as mellores obras da sección “Xénese”, composta por dez pezas dirixidas por directores menores de 30 anos, outorgando unha Mención de Honra a “La niña Tatuada” de Elisa Lanzas, e o Premio Xénese a Mellor Curtametraxe a “Las Pardas” de Simone Sojo.

O xurado profesional, formado por Matilde Rodríguez, Bruno Arias e Lucía Martínez, concedeu unha Mención de Honra da sección principal do certame á curtametraxe “Beautiful Men” de Nicolas Keppens, mentres que o premio “Xente de Aquí” á mellor curta galega recaeu en “Pura” de Carmen Méndez. O premio “Xentes” á mellor curtametraxe do certame foi para “A summer’s end poem” de Lam Can-Zhao.

O Festival incluíu ademáis a sección “Xermolar”, xa fóra de concurso, coa proxección de curtas infantís dirixidas aos escolares.