Celanova afonda na súa potencialidade turística

A Casa dos Poetas da Fundación Curros Enríquez en Celanova foi o escenario escollido para a presentación dun traballo académico arredor das potencialidades do turismo na vila de San Rosendo nos seus distintos eidos, obra do veciño José Antonio González López.

Baixo o nome “Diagnose turística do concello de Celanova”, o autor deste traballo de fin de mestrado na Universidade de Vigo deu lectura a esta análise do sector turístico de Celanova, baseado no seu patrimonio histórico, monumental, natural e tamén gastronómico.

Ademais de afondar no potencial intrínseco de Celanova como destino turístico, este traballo académico sobre o seu potencial reclamou tamén o liderado político e a participación da sociedade civil, co fin de planificar unha oferta orientada ao turismo cultural.

Asistentes

Asistiron ao acto Antonio Puga, alcalde de Celanova; José Antonio Fraiz Brea, director do mestrado de turismo e titor do traballo; Emma González Diéguez, xerente do Inorde, e Alexandra Seara Sobrino, xerente do Consorcio de Turismo da Ribeira Sacra.