Celanova, terra de enigmas

As rúas da vila enchéronse onte de bullicio, carreiras e risas con motivo da xincana cultural protagonizada por estudantes de Celanova e de Betanzos, con motivo da xornada de convivencia organizada entre ambos centros. “O obxectivo é facer un intercambio lingüístico para potenciar a lingua galega entre a mocidade de lugares tan distintos como poden ser un pobo da costa como Betanzos e Celanova, no interior. Nós xa fomos a Betanzos, e hoxe temos diferentes actividade en galego para que coñezan Celanova”, trasladaba Rafa Adán, docente no IES Celanova Celso Emilio Ferreiro.

A Fundación Curros Enríquez sumouse á xornada cunha proposta de xincana que permitiu aos mozos, os visitantes e tamén aos locais, coñecer un pouco máis a historia e o patrimonio celanovés. “É algo diferente, está moi ben”, comentaba Sabela Fraga e Sara Martínez, do IES As Mariñas antes de comezar a proba que lles levou dende a praza das Pitas ata a Alameda, pasando polo busto de Pepe Velo, Curros Enríquez e rematar na Praza Maior. “A xincana está pensada para o coñecemento da historia da vila, os seus personaxes… averiguar cosas nos propios lugares, pero tamén preguntando aos veciños ou buscando en internet”, resumía Paula Conde, responsable da Casa dos Poetas, que onte instalaba un posto na Praza para verificar os acertos e guiar ao alumnado ata completar o xogo. “A idea é ver como funciona entre os escolares para incorporalo as visitas e tamén facer adaptacións para familias e visitantes en xeral”, dixo Conde, nunha nova oferta para coñecer o patrimonio celanovés.

O equinocio de primavera marca o inicio das visitas escolares á vila de San Rosendo. A maridaxe de historia, arte, música e literatura galega nos programas que lidera a Fundación Curros Enríquez atraen cada ano a centos de escolares de toda Galicia. Ata o de agora, un total de 40 colexios confirmaron a súa participación no programa “Ven a coñecer a Celanova de Curros e Celso Emilio Ferreiro”. Algún, como o IES Moncho Valcárce das Pontes, o fixo por quinta vez este luns, recibindo de mans do alcalde e presidente da fundación, Antonio Puga, un certificado pola súa fidelidade con Celanova. O ano pasado houbo tres centros que superaron as 15 visitas e este ano vai ser un máis. “A zona de Vigo, Nigrán e Tui son as máis fieis”, desvelaba Conde, quen apuntou o repunte, este ano, da presencia de centros da provincia da Coruña.