Miles de persoas coroan Raigame como a capital da cultura galega

As cantareiras e pandereteiras marcaron o ritmo na romaría etnográfica Raigame que cada 17 de maio enche de alboroto, orgullo e tradición Vilanova dos Infantes. As estreitas e pétreas rutas deste núcleo celanovés, que mantén a esencia medieval, foron un fervedoiro de xente chegada de diferentes lugares, pero sobre todo de grupos de folclore, de cantareiras e de artesáns que manteñen vivas as tradicións e a cultura galega.

A festa, que medra ano a ano, é froito do traballo colectivo de institucións e veciños, de traballadores e voluntarios que coa súa cooperación permitiron recrear un escenario vivo da Galicia de principios do século pasado e desta edición, todo un éxito. O tempo acompañou e, moito antes das once da mañá a romaría xa recibira aos seus primeiros visitantes, desexosos de desfrutar dunha viaxe no tempo a través dos postos que, a pé de rúa ou nos baixos cedidos pola veciñanza, amosaban a arte, a cultura e a tradición galega a través dos seus oficios: fiadeiros, vidrieiros, xoieiros, ferreiros, telleiros, palilleiras e un longo etcétera que alternaban o seus postos coas tabernas, os postos de doces e os espectáculos, moi ben sincronizados, dos diferentes grupos de folclore que non deixaron que a música deixase de soar en cada recuncho do burgo medieval.

“O ambiente é impresionante, un exemplo de celebración do Día das Letras Galegas, do día da nosa cultura” dixo na súa intervención o alcalde celanovés, Antonio Puga, con motivo da entrega do premio honorífico Adolfo Enríquez ás cantareiras da provincia de Ourense, representadas polas mulleres das aldeas de Avión e Beariz. Nun acto que contou coa asistencia dos alcaldes das Terras de Celanova e Baixa Limia, do delegado territorial Manuel Pardo ou a conselleira Ángeles Vázquez, o presidente da Deputación Luis Menor tamén reivindicou a romaría como a mellor celebración do Día das Letras Galegas de toda Galicia. “Ourense é cultural, Ourense é tradición e Ourense é galego. Nada mellor que Raigame, que define perfectamente todas estas características”, dixo.

Dende o alto da Torre da Homenaxe, avistábase campos repletos de coches, mentres o autobús histórico completaba o percorrido entre Celanova e Vilanova. No burgo medieval, as zonas de sombra eran as máis cobizadas para compartir o almorzo de grupos de amigos e familias. Un descanso antes de seguir bailando e desfrutando cos obradoiros e demostracións, os monicreques, xogos populares, contacontos, recreacións, exposicións e proxeccións con toques de realidade virtual. Os Bolechas, que o ano pasado visitaron o burgo medieval co seu espectáculo, aproveitaron para presentar un libro adicado a Raigame e tamén estrearon selo na Sociedade Miño.