Xosé Benito Reza revela os segredos da capela de San Miguel no seu último libro

PRESENTACIÓN LITERARIA

O autor da obra presentada, Xosé Benito Reza, asegurou que Celanova "merece un centro de interpretación dende hai moito tempo"

Xosé Benito Reza, Noelia Rodríguez e Maximino Rodriguez. | Marcos Atrio

A Casa dos Poetas da Fundación Curros Enríquez en Celanova acolleu onte a presentación do libro “Ciencia e misterio en Celanova. A capela mozárabe de San Miguel”, obra de Xosé Benito Reza.

Esta autoedición, en torno a unha capela con máis de mil anos de antigüidade, estará dispoñible nas librarías a partir deste luns, en dúas edicións: galego e castelán.

O autor estivo acompañado por Noelia Rodríguez, profesora de historia no IES Celanova CEF, así como polo expolítico celanovés Maximino Rodríguez.

Tamén estivo presente Antonio Puga, alcalde da vila e presidente da Fundación Curros Enríquez, así como numerosos veciños que non quixeron perder o acto.

Peticións do autor

Na súa alocución, Reza enumerou tres accións que, na súa opinión, habería que levar a cabo na vila. Primeiramente, limpar a capela de San Miguel: “Non pode estar con herbas no tellado, como está agora”.

En segundo lugar, procurar o paradoiro de Froila, irmán de San Rosendo e impulsor da capela, “co uso do xeorradar, practicamente sen escavar”.

Por último, pediu un centro de interpretación que poña en valor os monumentos de Celanova, entre eles cinco BICs.